كتير مننا بيتفاجئ لما بيدخل الامتحان إنه فاكر السؤال وعارفه ، وعارف إجابته بس مش قادر يعبّر عنها بأسلوب الكتاب ، أو للأسف بينسى الإجابة تمامًا ، وممكن أول ما بنطلع من اللجنة بنفتكر الإجابة على طول ده كله بسبب طريقة المذاكرة غير الصحيحة .
وكمان أكيد مريت بتجربة إنك تكون “فاكر” إنك مذاكر الدرس كويس جدًا ، بس ممكن بعد أسبوعين تكون بتراجع عليه ، وتحس إنَّك بتشوف الدرس لأوّل مرة !!
العلماء عملوا تجارب على المُخ البشري عشان يعرفوا إحنا بنتذكر كام % من اللي إحنا بنذاكره
ووجدوا إننا لو بس قرأنا الدرس أو المُحاضرة فبنفتكر 20% بس من اللي قرأناه “لمرة واحدة”
ولو سمعنا بس الدرس لمرة واحدة فإحنا بنتذكر 30% من الدرس
ومخنا بيتذكر 40% بس من فيديو شفناه أو صور عن المحتوى اللي بنذاكره
ولو مثلًا شرحنا الدرس اللي ذاكرناه لحد تاني ، زميلنا مثلًا ، بنتذكر 50% من اللي قلناه
ولو مسكنا مجموعة مسائل بأفكار مختلفة وحليناها ، فإحنا بنفتكر بس 60% من الأفكار دي
طيّب إيه اللي يوصلني لـ 90% من اللي ذاكرته ، والنسبة بتزيد كل ما أستمر على الخطوات ؟؟
العلماء وجدوا إننا لازم نعمل كل اللي فوق ده عشان نوصل لنسبة 90% من التذكر لدرسٍ مّا
فمثلًا : هنمسك درس في اللغة العربيّة ، هنقرأ المُحتوى بتاعه بصوت عالي مرتين مثلًا أو أكتر لحد ما نستوعِب اللي قرأناه (وبكده نكون قرأنا وسمعنا) ، وبعدها ممكن نشوف فيديو على الإنترنت يساعدنا في فهم المعلومات دي أكتر ، وكمان ممكن نفكر بطريقة عملية إزاي ممكن نطبق اللي قرأناه على الواقع اللي إحنا عايشينه ، وممكن وإنت رايح المدرسة مع أصحابَك تشرحلهم شفويًا الدرس ، وتتناقشوا في اللي مش فاهمينه في الدرس ،،
وهكذا في بقية المواد ..
بكده هتكون حققت كل الأفعال والمُمارسات اللي هتخلّيك تفهم الدرس وتتذكره أسرع وبصورة أفضل ، ومتنساش إن نسبة الـ90% بتزيد مع استمرارك على التمارين دي ، وطريقة المذاكرة الفعّالة دي
وبالنسبة لأولياء الأمور ، ممكن تفكروا في أنشطة سهلة وبسيطة تفهموا بيها أطفالكم دروسهم على أرض الواقع ، مش بس ورقة وقلم
بنتمنالكم التوفيق
