كيفية حل مسائل الفيزياء

كتبته بسنت غنيم

إنك تعرف تحل مسائل دى من أول الخطوات اللى هتقدر تفهم بيها الفيزيا، عندك مشكلة فى الحل ؟! حاولت و حليت غلط ؟!
ركز بقي معانا فى القواعد العامة لحل أى مسألة فيزيا

1. خليك هادي و متخافش أول ما تشوف المسألة، دى مسألة مش نهاية العالم، أكيد ليها حل.

2. أقرأ المسألة أول مرة و لو مسألة طويلة قسمها لأجزاء و الأهم من دا تركز على الموضوع اللى المسألة جاية عليه.

3. بعد القراية هترسم مخطط أو رسم كروكى على اللى فهمته و احب أقولك الرسم الكروكى دا لو طلع صح يبقي حليت 80 % من المطلوب و لو مش عارف الحل ارسم برده .. الرسم عليه درجة متضيعهاش.

4. هتكتب على جنب الحاجات المعلومة فى المسألة و دى هنسميها Known و لو الحاجات المعلومة فى منها أكتر من واحدة رقمهم يعنى مثلا لما يكون عندك أكتر من سرعة فهتقول V1 و V2 و هكذا.

5. دور على الحاجات المطلوب منك كويس و اعرف كام حاجة علشان ساعات بتنسوا و اكتب جنبهم unkown

6.  كده انت خططت للحل تبدأ بقي تكتب كل المعادلات اللى تعرفها عن الموضوع.

7. هتختار منهم المعادلة اللى بتجمع كل المعلوم و المجهول و هتبقي هى دى المعادلة اللى هتشتغل عليها.

8. هتبدأ تحل بقي المعادلة بالحاجات المعلومة عندك و لو معرفتش هات بحاجتين من المعلومين حاجة مجهولة.

9. هتكرر اختيار المعادلة المناسبة مع كل حاجة مطلوبة منك.

10. اعمل دايرة او مربع حوالين الاجابة علشان تبقي واضحة و أهم حاجة تبقي واثق ان كل مسألة و لها حل و متخافش.

الطريقة دى بجد مش للفيزيا بس دا ممكن كمان تحل بيها أى مشكلة بتواجهك لأن حل المسائل بيساعدك على حل المشكلات .