إزاي تفتكر اللي ذاكرته بشكل أسرع وبالتفصيل

بتذاكر مادة معيّنة وبتيجي تسمعها على نفسَك وتلاقي نفسَك ناسي حاجات ، أو واقعة منَّك أجزاء مع إنَّك حفظتها كويّس ؟
دي مشكلة طبيعيّة ، وبتحصل مع كتير مننا .. ممكن تتصدم بكده وإنت جوه اللجنة ، ولو إنت سعيد الحظ ممكن تكتشف ده قبل كده وإنت بتسمَّع على نفسك
طب هل في طريقة معيّنة أعرف أحفظ بيها كويّس ومنساش ولما آجي أذاكرها أفتكرها بالنص ؟
والإجابة هي أيوة .. في طريقة قديمة جدًا من قبل الميلاد ، بس نفعت ناس كتيييرة أوي أوي ، مش بس في المذاكرة ، لا .. في حياتهُم كلها
الطريقة دي اسمها Palace Memory أو قصر الذاكرة ، وفي ناس بتطلق عليها لقب طريقة لوكي ، بترتِب فيها عقلك وبتحط بنفسك كل المعلومات اللي إنت عاوز تحفظها في المكان وبالشكل اللي إنت هتحبه
طب تعالا نعرف مُحتواها أو هعمل إيه عشان أبني القصر ده ، وأبنيه صح
فلو أخدنا مثال لو إنت طالب ثانوية عامة وبتذاكر مادة زي الفيزيا أو التاريخ أو غيرهم ، طويلة صح ؟ اممممممم .. طب تعالا نقسمها لفصول ، ونحاول بعدين نربُط الفصول دي ببعضها .

هنمسك فصل مُعيّن ، وتخيّل معايا بيتك أو اوضتك تحديدًا ، أو أي مبنى إنت حافظ تفاصيلها بدقة … هنرجع لأوضتك ، عشان تدخلها لازم في باب ، الباب هتحط فيه معلومة واحدة وبس ، ولتكن هي مقدمة للفصل اللي إنت بتذاكره ، تيجي مثلا هتدخل في الأوضة خطوة واحدة ، هنا هتحط المعلومة اللي بعدها ، وهكذا ، بتقسم تفاصيل الأوضة على المعلومات ، بحيث إنك تحط في كل تفصيلة معلومة واحدة وبس، ممكن المعلومة متكونش بشكلها كده ، ممكن تحطها بصورة رمزيّة ، أو حاجة مُضحكة أو مقطع ألفته لقانونٍ مّا وهكذا ..

هتيجي وإنت بتذاكر أو بتمتحن ، كل اللي عليك إنك تفتكر تفاصيل الأوضة ، وإنت حطيت المعلومات فين ، الموضوع بسيط بس عاوز تمارين لحد ما تتعوّد
طب تعالا نلخص اللي فوق ده في خطوات :
  1. 1. هتختار المبنى أو القصر بتاعك ، وممكن يكون شارع ، اختاره يكون مكان كبير تقدر تتحرك بيه بحريّة أكبر
  2. (adsbygoogle = window.adsbygoogle || []).push({});

  3. 2. اصنع علامات مميّزة بعقلك ، زي مثلًا إنت هتمشي إزاي في المكان ده بعقلك ، من اليمين للشمال أو العكس ، وركِز على الخطوات دي عشان متتلخبطش بعدين
  4. 3. دي الخطوة الأهم ، واللي هيترتب عليها إنَّك هتتذكر بسهولة ، إنَّك تقعد تكرر إنت هتمشي إزاي في القصر أو المبنى أو المكان اللي اختارته ، وبالترتيب ، ومثلًا هتقول بصوت عالي معلومة معيّنة ، في حين إنك بتفكر بعقلك إنك ماشي جوا المكان ده ، وعينك فعلا هتكون شايفة المكان ، فبالتالي المعلومات اللي إنت مرتبها هتلاقيها بتخرج بتلقائيّةمنك .
  5. 4. لو فاكر التفاصيل المميزة للمكان اللي اختارته ، اربطها بالمعلومات الأدق أو الأصعب ، حاول على قد ما تقدر تكون التفاصيل غير تقليديّة بالمرة زي مثلا لون حيطة مُميّز وغيرها من التفاصيل.
  6. 5. كشخص مُبتدأ .. لازم تزور القصر أو المكان بتاعك كل فترة والتانية ، عشان تحفظ أكتر الممرات والتفاصيل وكل شئ إنت حاطه في مكانه .. لحد ما كل شئ يثبت بذهنك.
زي ما قلتلك فوق .. لازم الصبر لحد ما المهارة دي تكون مُحترف فيها ، وبتوفر عليك كتير من الوقت والمجهود ، وبتثبت المعلومات بشكل أفضل بكتير، زتنساش تشيّد قصور تانية لمعلومات تانية

ولو عندَك أيّ تعليق أو أي استفسار عن الموضوع ده أو عاوزنا نتكلم عن شئ معيّن ، سيبلنا تعليق

أسرة مذكرة بتتمنالك التوفيق

Close Menu
error: ممنوع نقل المحتوى