وتقريبًا ده أكتر فرع بنحبه علشان مش بنحفظ كتييير.
طيب أيه رأيك لو نساعد بعض نفهم النحو صح ومش بس كده لأ ونجيب الدرجة النهائية فيه كمان.
متفقين أكيد، يلا بين نبدأ
دول كام حاجة نحو هتعجبك
ركز بقى يا جميل علشان تفهم وصدقني مش هياخد منك الشرح ده كله نص ساعة بس!.
وهتطلع كمان ملك زمانك في النحو وده وعد بيني وبينكم.
ليا واحد صديقي وهو مدرس فيزياء دلوقتي بيقولي أنه حافظ ألفية ابن مالك
وهو في الثانوية العامة كان بيطلع للكلمة الواحدة أكتر من اعراب وبيدخل في جدالات كتير مع مدرسه
اللي فهمته من كلامه إن النحو عمره ما كان بالشكل أو بحفظ الحاجات اللي بتتكرر..
النحو ده محتاج تكتكة
شوف بقى
هنقسم الشرح دروس كده زي ما هما متقسمين في الكتب
علشان لو حبيت تحل على الدرس ده في أي كتاب معاك
متتعبش كتير
درس النحو #1: همزة الوصل وهمزة القطع
هنقول معلومتين اتنين بس هنلخص بيهم الدرس كله
يعني وصل؟
وصل يعني وانت بتقول كلمة فيها ألف في أولها الألف ده مش بيوقفك زي مثلًا أيه
كنت ماشي وأحمد وقفني.
لو أخدت بالك الألف بتاع أحمد موقفتش عنده وتقريبًا منقطوش أصلًا صح!
طيب لو قولنا بقى يعني أيه همزة القطع
القطع، باين من اسمها أنها هتقطع كلامي وهتوقفني
نقول مثلًا كنت ماشي وأسامة وقفني
أفتكر كده فهمتها صح ^^
طيب إزاي أعرف أي كلمة بتبتدي بألف تبقى وصل ولا قطع
أول حاجة خلي قبل الكلمة دي واو مثلًا ولو وقفتك تبقى قطع ولو لا تبقى وصل.
كده درس همزة الوصل وهمزة القطع خلص.
نروح بقى للي بعده
درس النحو #2: المشتقات
مشتقات دي أول ما بنشوفها بنفهم أنها حاجة اشتقيناها من حاجة تانية.
الكلام ده صح جدًا
عندنا حاجات اسمها اسم الفاعل واسم المفعول وصيغة المبالغة
طيب دول هنشتقهم إزاي؟
اسم الفاعل بيكون زيه كده عادل (من فعل عدل)
طيب لو الفعل مش من 3 حروف كده بس أعمل أيه؟
زي مثلًا يؤمن نقول أيه مؤمِن
أخدت بالك أنا عملت أيه؟
جبت المضارع من الفعل بس هنا المضارع موجود جاهز
خليت أول حرف في المضارع ده ميم وعليها ضمة
وجيت على الحرف قبل الأخير على طول خليت تحته كسرة
جميلة مش كده!
أما اسم المفعول فهو زي اسم الفاعل بالظبط
بس بنخلي الكسرة دي فتحة
هتقولي أه بس ده بتاع اللي مش 3 حروف
فين بقى اللي 3 حروف
صح جدًا ممتاز
هتجيب أي فعل وتخليه زي الكلمة دي [معمول].
وبردو صيغة المبالغة بنفس الطريقة دي سهل الكلام ده مش كده؟
بس الفرق إن صيغ المبالغة ليها شكل ثابت وهي
فعال ومفعال وفعول وفعيل وفَعِلْ
أبقى أحفظهم متنساش
طيب صيغ المبالغة دي زي أيه مثلًا؟
زي مثلًا يعني حفيظ وشكور.
ده واجب تحله دلوقتي وتقولنا الإجابة في الكومنتات
الكلمات دي على وزن أيه من أوزان صيغ المبالغة:
مقدام – عليم – فطن.
الواجب ده ضروري ولو سمحت متكملش غير لما تحله.
كده خلصنا درسين!
درس النحو #3: التفضيل
احنا عاوزين نفهم صح
فهنشوف الأول يعني أيه كلمة تفضيل دي
تفضيل يعني معانا حاجتين أو أكتر وبنشوف مين أحسن فيهم من التاني، مش كده؟
زي مثلًا عبدالله أذكى من مصطفى.
كلمة أذكى دي موجودة علشان تفضل عبدالله عن مصطفى في الذكاء.
وكمان لو قولنا عمرو أحسن لاعب في مصر.
أحسن دي كمان للتفضيل يعني بتفضل عمرو عن كل لاعب في مصر.
كده درس التفضيل خلص!
كان درس صغير جدًا
درس اسم الزمان واسم المكان صغير بردو..
درس النحو #4: اسما الزمان والمكان
اسم الزمان: يعني أكيد اسم بيكون ليه علاقة بالزمان
وكمان اسم المكان بيكون ليه علاقة بالمكان
معروفة
اسم الزمان والمكان بيكونوا بنفس الطريقة دي جميلة
دخل – يدخل – مَدخل
يخرج – خرج – مَخرج
وكده!
طيب والفعل الغريب بتاعه زي مثلًا
التقى – يلتقي – مُلتقَى
لو لاحظت عملت معاه زي ما عملت مع اسم المفعول صح؟
نكمل إن شاء الله الشرح قريب جدًا..
وبعد ما نخلص شرح المنهج كله هنزله Pdf علشان اللي يحب يطبعه
أيه رأيكم؟
